Apulei
metamorphoseon libri XI

liber IV caput XI

[1] tunc nos in ancipiti periculo constituti vel opprimendi nostri vel deserendi socii remedium e re nata validum eo volente comminiscimur. [2] antesignani nostri partem, qua manus umerum subit, ictu per articulum medium temperato prorsus abscidimus, atque ibi bracchio relicto, multis laciniis offulto vulnere, ne stillae sanguinis vestigium proderent, ceterum Lamachum raptim reportamus. [3] ac dum trepidi religionis urguemur gravi tumultu et instantis periculi metu terremur ad fugam [4] nec vel sequi propere vel remanere tuto potest vir sublimis animi virtutisque praecipuus, multis nos adfatibus multisque precibus querens adhortatur per dexteram Martis, per fidem sacramenti, bonum commilitonem cruciatu simul et captivitate liberaremus. [5] cur enim manui, quae rapere et iugulare sola posset, fortem latronem supervivere? sat se beatum qui manu socia volens occumberet. [6] cumque nulli nostrum spontale parricidium suadens persuadere posset, manu reliqua sumptum gladium suum diuque deosculatum per medium pectus ictu fortissimo transadigit. [7] tunc nos magnanimi ducis vigore venerato corpus reliquum veste lintea diligenter convolutum mari celandum commisimus. et nunc iacet noster Lamachus elemento toto sepultus.